Poem by: Jhannah Soriano
Art by: Roselle Andrea Santiago
Hiwain nang malillit
ang mga pagsisisi (bawang, at sibuyas)
Gisahin hanggang lumambot at bumango.
Mag-ingat sa mantika at tandaan na
nakaraan mo lamang iyon.
Pagkatapos ay isabay na ang
mga sakit na idinulot sayo (manok o baboy)
Hayaang maluto hanggang
wala nang pula ang karne
at ikaw rin ay naghilom
Lagyan ng tig-kalahating tasa
ng inis at pagod (toyo at suka)
Dagdagdan ng lungkot at takot (paminta at laurel)
Haluin lahat ng pinigilan mong luha (tubig)
At pakuluin hanggang
Napatawad mo na ang iyong sarili.
Isa-isahin mo
Ang mga pait sa mundo
kaya mong hiwain, pakuluin
at magluto ng masarap na adobo.
Comments